ADAU tələbələri “Qarabağ Hakatonu 2026”da qaliblər sırasına daxil olublar
Azərbaycan Dövlət Aqrar Universitetinin (ADAU) tələbələrinin iştirak etdiyi komanda “Şəhərsalma və Memarlıq İli”nə həsr olunmuş “Qarabağ Hakatonu 2026”da böyük uğur qazanaraq qaliblər sırasına daxil olub. Bu hadisə universitetimizin tələbələrinin innovativ düşüncə qabiliyyəti və peşəkar hazırlıq səviyyəsinin yüksək olduğunu bir daha sübut etdi.
Yarışa 13 müxtəlif ali təhsil müəssisəsini təmsil edən 52 tələbə qatılıb. Həcmli və rəqabətli mühitdə iştirakçılardan işğaldan azad edilən rayonlarla bağlı investisiya müsabiqələrini və layihə imkanlarını birləşdirən interaktiv platformanın konsepsiyasını hazırlaması tələb olunub. ADAU tələbələri bu mürəkkəb tapşırığı uğurla icra edərək, qabaqcıl ideyaları ilə diqqət çəkiblər.
Hakatonun gedişatı ərzində komandalar öz ideyalarını dərinləşdirib, təklif etdikləri həll yollarının funksional modellərini yaratmış və hazırladıqları layihələri ekspertlərə təqdim etmişlər. Yarış prosesinə akselerasiya və inkubasiya mərkəzlərinin nümayəndələri mentor qismində cəlb olunub. Onlar komandalara texniki və biznes tərəfdən dəstək göstərərək, ideyaların reallaşdırılmasına töhfə veriblər. Bu mentorluq dəstəyi tələbələrin layihələrini daha da mükəmməlləşdirməsinə və peşəkar bacarıqlarını inkişaf etdirməsinə şərait yaradıb.
ADAU tələbələrinin bu uğuru universitetin təhsil keyfiyyətinin yüksək səviyyədə olduğunu və tələbələrin müasir tələblərə uyğun hazırlandığını göstərir. Biz universitetimizin tələbələrini bu qürur verici nəticə münasibətilə təbrik edirik. Onlara gələcək elmi, peşəkar və şəxsi fəaliyyətlərində də eyni qədər uğurlar, yeni nailiyyətlər və ilham verici layihələr arzulayırıq. ADAU kimi qabaqcıl təhsil ocağında yetişən gənclərin ölkənin inkişafına və regionların bərpasına olan töhfələri dəyərli hesab olunur.